Xose B. Álvarez, representante asturianu n’ELEN: “Nel Estáu Español hai casos de discriminación llingüística anguaño”

Nel nuesu programa de güei falamos con Xose B. Álvarez, representante asturianu n’ELEN (l’acrónimu n’inglés de la Rede Europea d’Igualdá Llingüística) porque fai unos díes vien d’asoleyar un informe pa la Revisión Periódica Universal (UPR) de les Naciones Xuníes no que cinca a los casos de discriminación y ataques escontra los falantes de llingües estremaes del castellanu nel Estáu español.

L’informe detalla casos específicos d’ataques y discriminación escontra falantes d’aragonés, asturianu, catalán, gallegu y vascu nel periodu ente 2007 y 2013.

Una delegación de representantes d’ELEN atendió’l xueves 21 a la sesión de la UPR onde l’Informe de Derechos Humanos del Estáu español foi revisáu pol Reinu Xuníu, Sierra Lleona y Macedonia.

Los miembros d’ELEN pertenecientes a Iniciativa pol Asturianu informen de más de 25 casos de seria discriminación llingüística haza los falantes d’asturianu. Los casos reportaos son solamente una parte de la discriminación que realmente asocede, ya que en munchos casos les víctimes d’esos abusos illegales nun informen d’ello y nun algama les ONGs o los medios.