Xosé “Ambás”: “Medrei col ciñu polo propio” / Fernando Glez. Asoc. Garabuxada: “L’Anguleru ta calando n’Asturies”

Esta selmana entamamos el nuesu programa col Editorial del Presidente d’Iniciativa pol Asturianu, Inaciu Galán, que tien el títulu de “35 años d’un robu llegal a la llingua asturiana”.

Un convidáu mui célebre avérase al nuesu programa radio. Trátase del estudiosu de la tradición oral asturiana, el televisivu Xosé Antón Fernández, conocíu pol alcuñu d’Ambás, la so parroquia nel conceyu Grau.

Ambás va falanos de la recuperación d’una mazcarada de Los Aguilandeiros de San Xuan de Villapañada, nel conceyu de Grau, gracies al trabayu de campu de Ramsés Ilesies y el propiu Xosé Antón Fernández ‘Ambás’ y la collaboración del Grupu de Baille Tradicional Xeitu y a la parroquia de San Xuan de Villapañada.

El nuesu siguiente convidáu ye Fernando González de l’Asociación Cultural Garabuxada de L’Arena y va falanos del personaxe conocíu como L’Anguleru.

L’Anguleru foi un personaxe creáu pola propia asociación cultural “Garabuxada”, de L’Arena (Sotu’l Barcu), en 2008 al envís de potenciar una Navidá más cercana a la tradición asturiana. Escoyóse’l personaxe d’un anguleru por ser esti oficiu ún de los más carauterísticos de la llocalidá de L’Arena y por tar la pesca de l’angula mui venceyada a bona parte de la mariña asturiana, como manera d’identificar más fácilmente a la sociedá asturiana. Caberamente ta en procesu de consolidación por ser una figura motivadora pal deprendimientu de la llingua asturiana a les xeneraciones más nueves.