El Toma3 de Xixón acueye esti viniente domingu 28 de xunu la grabación d’esti ciclu de conciertos en formatu íntimu, grabaos y emitíos per Internet.

En marzu del 2019 nacía Amosando, un ciclu de presentaciones de discos entamáu por musicasturiana.com, con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa qu’aporte a persones de tol mundu.

Silvia Quesada -cantante de Tejedor y Los Gatos del Fornu- va presentar ‘Prefiero Ver Llover’, la so segunda referencia discográfica en solitario na que’l so soníu evoluciona hacia una propuesta pop mui cuidada y completa. Pela so parte, Cerezal van tocar los temes de ‘La Cereza’l Cielu’, un discu qu’entemez folk, pop, rock y incluso electrónica, llevando a la música de raíz tradicional a nueves sonoridaes. Los dos trabayos son una renovación dientro de la música fecha n’asturianu y tuvieron premiaos nos AMAS 2020.

La llibrería-café Toma3 de Xixón va acoyer esta grabación a les 17.00h d’esti domingu 28 de xunu. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y Goxe Producciones.