Esti pasáu sábadu 6 d’agostu tuvo llugar nel salón d’actos de la feria internacional de muestres en Xixón, la entrega de los gallardones del centru asturianu de Madrid, conocíos como premios urogallo na so edición del añu pasáu 2015.
Nel estaya de llingua asturiana, el gallardonáu foi Pablo Suárez García, investigador, traductor al asturianu y académicu de la llingua asturiana, conocíu poles sos traducciones d’obres como Tirán el Blancu, coeditáu cola Acadèmia Valenciana de la Llengua, Proses profanes y la Tragédia de Caldesa de Joan Roís de Corella. Tamién ye l’autor de la versión n’asturianu de Don Quixote de la Mancha.
Enantes de ser nomáu académicu, tuvo participáu cola institución nes sos «Xornaes Internacionales d’Estudiu» y premiáu en delles ocasiones nos sos Concursos d’Investigación. D’otra banda la so formación ye peramplia: llicenciáu n’Inxeniería Superior de Telecomunicaciones, en Matemátiques y en Filoloxía Hispánica amás de Doctor en Filoloxía pola Universidá d’Uviéu y Especialista en Filoloxía Asturiana.
