L’espaciu unitariu de la izquierda soberanista asturiana continúa tres el desagospiu del CSOA La Madreña. Busca algamar 3000 euros pa financiar les obres nel so llocal nuevu
La Llegra da un pasu alantre. Tres el desagospiu del CSOA La Madreña -y con ello, la perda del primer Espaciu La Llegra-, esta iniciativa pal alderique y l’acción unitaria de la izquierda soberanista asturiana va abrir un llocal n’Uviéu enantes qu’acabe l’añu.
El nuevu Llar la Llegra va ser un espaciu autoxestionáu pa siguir coles dinámiques de trabayu colectivu nes que se venía afondando dende febreru de 2014. Amás de ser un puntu d’alcuentru ente persones y sensibilidaes de la izquierda soberanista asturiana, esti espaciu va desendolcar actividaes de too calter coles que visibilizar y normalizar a esti movimientu políticu. Tamién va ser un sitiu plural, abiertu a otros movimientos sociales y culturales.
Yá hai llocal arrendáu na cai Postigu Baxu. Agora namás hai facer frente a les obres y asegurar la vidabilidá económica del proyectu. Pa ello, La Llegra entamó una campaña de crowdfunding (financiación colectiva al traviés d’Internet) cola qu’algamar los 3000 euros del presupuestu d’obra.
Crowdfunding de proximidá
“Abriendo Espaciu!” ye’l llema de la campaña na plataforma Verkami. Nella, se pue collaborar aportando dende 10 euros hasta 300 euros. A tola xente que collabore van dase-y recompenses a mou d’agradecimientu.
Les recompenses tán caracterizaes por ser productos de proximidá -Cerveza Caleya, Sidra L’Allume-, venceyaos al comerciu del barriu antiguu -Boca a Boca, L’Arcu La Vieya- y de calter cultural -discos de música, llibros, entraes pa conciertos..-. Tamién hai camisetes y postales de La Llegra, incluso la posibilidá d’organizar una folixa asturiana n’otros llocales de fuera d’Asturies.
La campaña va acabar el próximu 29 d’avientu. Fecha na que La Llegra aspira a tener recaudaos los 3000 euros y finalizaes les obres pa inaugurar esti nuevu espaciu de la izquierda soberanista asturiana enantes del 31 d’avientu.
