Iniciativa pol Asturianu tendrá stand con seis empreses comprometíes col idioma na Feria de Muestres 2017

La reivindicación del asturianu va tar presente na FIDMA dempués de décades ensin presencia.

Iniciativa pol Asturianu anunció güei que va cuntar con un stand na Feria de Muestres d’Asturies 2017. Un espaciu que la organización quixo compartir con empreses comprometíes col asturianu y que va da-y visibilidá y presencia al asturianu nel ámbitu socioeconómicu a lo llargo de les más de dos selmanes que dura l’eventu, nes que van pasar cientos de miles de persones pel recintu ferial xixonés.

Xunto a Iniciativa pol Asturianu van tar nel so espaciu, trés editoriales, Ediciones Trabe, Saltadera y Pintar-Pintar, una empresa d’animación, Trebeyos, la tienda-marca de productos de regalu Miguina de pan y una productora audiovisual y de márketing, CuatroGotes Producciones. Les seis empreses presentes nel stand tienen un reconocíu compromisu col usu del asturianu y son parte del texíu empresarial que vien trabayando dándo-y normalidá al asturianu nos sos ámbitos.

“Pa Iniciativa pol Asturianu esti ye un pasu perimportante, yá que vamos consiguir una visibilidá que nunca enantes fuera posible pa nós, tando nun eventu pel que pasen cásique tolos asturianos y asturianes, amás de miles de turistes que tán n’Asturies per estes feches”, esplicó Inaciu Galán, presidente d’Iniciativa pol Asturianu. “Compartir l’espaciu con estes empreses va permitir que tengamos una imaxe de normalidá énte la sociedá, asina como que se visibilice que l’asturianu ye una ferramienta que non solo ye un patrimoniu cultural, sinón tamién una ferramienta que crea empléu y xenera riqueza”, esplicó Galán.

Xunta a les empreses, Iniciativa pol Asturianu, que como ye norma pa la organización nun recibe nenguna ayuda pública pa la organización de les sos actividaes y tampoco nesti casu de la organización de la Feria, tendrá espaciu tamién nel stand pa los sos proyectos de medios de comunicación, el programa de radio Iniciativa pol Asturianu nes ondes y la canal de tv per internet Alderiques d’Asturies.

Actividaes complementaries d’animación

L’espaciu d’Iniciativa pol Asturianu na FIDMA va cuntar amás con actividaes, sorteos, firmes de llibros, xuegos tradicionales y otres iniciatives que van animar la presencia de la organización y les empreses na Feria Muestres.