Iniciativa pol Asturianu espón los problemes del asturianu na ONU

Una delegación d’Iniciativa pol Asturianu va participar esti xueves 25 de xunu na misión internacional que va tar presente nel 29 Conseyu de Drechos Humanos celebráu pol Altu Comisionáu de la Organización de les Naciones Xuníes (ONX). Esta visita surde frutu del trabayu entamáu nel ámbitu internacional por esta organización y pola pertenencia de la mesma, como representante d’Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa.

Va unos meses Iniciativa pol Asturianu fizo públicu l’informe que s’apurriera a esti Altu Comisionáu de Drechos Humanos, preparáu pola Vocalía de Rellaciones Internacionales de la organización, dirixida por Xosé B. Álvarez. Agora ye’l momentu de la so defensa na sesión que dientro d’esti Conseyu va dedicase al cumplimientu de los Drechos Humanos n’España.

La delegación ibérica d’ELEN presentará na sesión de control d’esti xueves los casos de discriminación que viven los falantes de les llingües distintes del castellán n’España, incluyendo la situación de violación de drechos humanos llingüísticos que viven n’Asturies los asturfalantes, especialmente negativa pola falta d’oficialidá que namás asturianu y aragonés carecen nel estáu español, magar les recomendaciones feches dende instituciones europees ya internacionales.

Los representantes d’Iniciativa pol Asturianu que viaxarán a Xinebra estos díes participarán na sesión onde se fadrá revisión de los Drechos Humanos n’España énte l’Altu Comisionáu y representantes del Gobiernu d’España, que defenderán la so política al respective de les llingües minoritaries. Amás, demientres la so visita, fadrán por dar a conocer la situación del asturianu énte los cientos de representantes internacionales que participarán nesta xornada mundial, na que la propia presencia d’Iniciativa pol Asturianu dexa a les clares la situación d’anomalía llegal ya incumplimientu de los Drechos Humanos que supón la situación llegal de la llingua asturiana, fuera del marcu xurídicu normal de la oficialidá.

La delegación que va asistir a Xinebra tará formada pol presidente de la organización, Inaciu Galán, y la responsable d’activismu en redes sociales, Marissa Bordallo. Amás d’esta importante cita, van celebrar un aconceyamientu nel Centru Asturianu de Xinebra, nel que van presentar Iniciativa pol Asturianu a los munchos asturianos emigraos na zona, asina como establecer pontes de collaboración pa la realización d’actividaes y el fomentu del usu del asturianu ente la comunidá asturiana en Suiza.