Iniciativa pol Asturianu denuncia n’Uesca la situación de peligru de la llingua asturiana y reclama

Iniciativa pol Asturianu tuvo esti branu énte les más de setenta delegaciones d’organizaciones en defensa de llingües d’Europa presentes nel XXIV Congresu de Llingües y Cultures Europees Amenazaes, en Uesca. Un congresu nel qu’hebo tiempu pa les conferencies, los alderiques alredor de la situación de les llingües más amanezaes n’Europa y pa la música, con conciertu onde pudieron sentise delles llingües minorizaes como l’aragonés, llingua propia del llugar onde se celebró’l congresu. Amás, los congresistes visitaron dellos llugares del altu aragón, pa conocer la realidá cultural y llingüística.

L’asturianu tuvo presente con delles ponencies. Alredor de la presencia de la llingua nel sistema educativu, Iniciativa pol Asturianu denunció los recortes en Bachilleratu, onde l’asignatura pasó de cuatro hores a una selmanal esti cursu, asina como la falta d’aiciones pa consiguir un sistema educativu que garantice la tresmisión xeneracional de la llingua asturiana”. Inaciu Galán, presidente d’Iniciativa pol Asturianu esplica la presencia de la organización nesti eventu internacional.

L’alcuentru entamáronlu’l Consello d’a Fabla Aragonesa y ALCEM (Asociación poles Llingües y Cultures Europees Amenazaes) entidá esta cabera na qu’Iniciativa pol Asturianu foi acoyida como organización miembru colos votos favorables de tolos represenantes d’ALCEM, na xunta xeneral qu’organizaron coincidiendo col congresu.